سئوگی دونیاسی

دویا دویا باخانمادیم اوزونه ...

غفیل گلیب بیردن کؤچوب یانیندان
نیسگیل لریم چارپیلدی داغ - دوزونه
اجل گلیب یاخالادی منی ده
دویا دویا باخانمادیم اوزونه

یازدیم سنی کیتابلارین سطرینه
آنام ، آتام ، ایلک عشقیمین خطرینه
حسرت قالدیم بنؤوشه لر عطرینه
دویا دویا باخانمادیم اوزونه

چیراقلارین ایشیق سپدی یولوما
کوسگون گولم ، توخوندولار کولوما
گؤزو باغلی قاندال ووروب قولوما
دویا دویا باخانمادیم اوزونه

مندن سونرا یاشایاجاق هر ایزیم
آغرین بیزیم ، قادان بیزیم ، قان بیزیم
بیرجه سنه چوخ وورولدوم تبریزیم
دویا دویا باخانمادیم اوزونه ...

(بابک قوجازاده)

+ نوشته شده در  شنبه بیست و یکم تیر 1393ساعت 2:12  توسط بابک قوجازاده  | 

سنه نه یازیم ؟...

سنین شراب رنگلی گؤزلریندن

و درد لریم اوستونده آجیشان اورمو دان

ساچلارینین دهشت گئجه سیندن

دوداغینین قان پؤهره سیندن

مین دؤنه وئردییین یاز وعده سیندن

من سنه نه یازیم ؟

 

داریخیب آغلادیغیم شئعیرلردن

حزین حزین سیزلایان موزیک لردن

تبریزین قهوه خانالاریندا

قندسیز ایچدیییم آجی چایلارین نئشه سیندن

اؤزوموزدنسه یازیم می سنه ؟

 

بوراخ سرتلییینی قیزا یاراشماز

نه قدر نازالانسان باشیمدان آشماز

کیم دئییر کوسنلر بیرگون باریشماز؟

قوجاق دان ، بوجاقدان یازیم می سنه ؟

 

تورک قهوه سینه بنزه ییر دیلین

اؤنونده دیز چؤکوب سنه نه دئییم ؟

سؤیله بیر دؤنه سؤیله سئوگیلیم

سئوگیمین شعلردن داشماسین یازیم ؟

بو شعردن باشقاجا

سنه نه یازیم ؟...

 

(بابک قوجازاده)

+ نوشته شده در  جمعه سیزدهم تیر 1393ساعت 17:1  توسط بابک قوجازاده  | 

گیزلیجه سئویرم سنی ...

گؤزوندن آلیرام سؤزجوکلریمی

شعیردن شئعیره داشیرام سنی

گجه دن ، گوندوز دن ، زامان دان گیزلین

یالنیز اؤز اؤزومله یاشیرام سنی ...

 

سئوگیمی هامیدان گیزلین یازیرام

سانیرام گؤرنلر قیسقانا بیزه

کیمسه نی قویمارام دوشونه منی

آختاریب ، گزیشیب یئته بیر ایزه

 

ائله قورویورام سنی هامیدان

دؤولت لر سیرلارین گیزلتمز بئله

قورخورام قورخولو قارا یاخالار

آدینی اؤیره نیب سالالار دیله

 

بیزلری توتسالار اؤلدوره جک لر

دونیانین ان گیزلی پارتیاسی ییق

قانونلار سیندیران دئوریم یارادان

گیزلیجه یازیلان آنا یاساییق

 

گیزلیجه ، گیزلیجه سئویرم سنی

گئجه لر پاپریز لا ، شعریمله بئله

قویمارام هئچ زامان سنین کیملییین

شعریمدن هایلانیب قونسون بیر دیله !

 

(بابک قوجازاده)

+ نوشته شده در  جمعه ششم تیر 1393ساعت 11:36  توسط بابک قوجازاده  | 

خیالینلا باش باشا

یئنه ده خیالین باشیما ووردو

الیمده بیر پاپریز کوچه یه چیخدیم

گزیشدیم شهری تک باشیما من

ان اوجا ائولری باشیما ییخدیم

 

دئییندیم باش اوجا سرت چیراقلارا

آغلادیم یوللارین داش اوره یینه

اوره یی سینماسین آغاجلار دئیه

یالاندان گولدوم ده هر چیچه یینه

 

بیزیم ده سئوگیمیز ماشینلار کیمی

تله سیک اؤتوشدو زامان یولوندان

تهرانی بوروین دلی کولک لر

غفیلدن آییردی قولون قولومدان

 

بلکه ده قیسمتیم دئییلمیش ایدین

من سنی باهاردا سئومیشیدیم آخی

دئییرلر پاییزدیر سئوگیلی لرین

سئوگینین فصلیده اؤتموشدو داخی

 

بئله جه خیاللار سارسیدیر منی

سئوگی دن سویویوم ؟ سئوگییه قیزیم ؟

قوپاردیر دونیادان ایتیرم بیر آن

اؤزومه گلیرم سؤنوب پاپریزیم ...

 

آیریلیب اؤزومدن گئدیرم ائوه

گئجه لر فیکریمله قالیر کوچه ده

بیلمیرم صاباح دا گؤروشه جه یم

گئجه یله ، کوچه یله ساعات نئچه ده ؟

 

کیم دئییر روح گئتسه اؤله جک اینسان ؟

من نئجه یاشیرام بس سندن اوزاق

دئییرم دوکتورلار کیتابلاریندا

اؤلوم چون بیز یئنی قانونلار یازاق

 

اؤپورم شکلینی گیزلیجه سنین

هله لیک یاتیرام گئجن خیر اولسون

یاتاقدا قوللاریم آچیق یاتیرام

قوی سنین خیالین یوخوما دولسون ...

 

(بابک قوجازاده)

+ نوشته شده در  دوشنبه دوم تیر 1393ساعت 13:10  توسط بابک قوجازاده  | 

الوداع ...

الوداع ای ساحل آرام من

الوداع ای آبیِ بی انتها

الوداع ای سرخی تنگ غروب

ای تلالوهای شرابی الوداع ...

 

بعد از این نام تو را بر که سپارم تا ابد

در خروش خاطراتش بازماند خاطرت ؟

 وز پس این سالهای نا نجیب

نام تو نام دل آرایی شود

دختری زیبا و عشقی بی بدیل

عاشق اش گردد جوانی از جوانان وطن

زیر باران ، زیر چتری ، لحظه ای ، جایی یواش

نام زیبایت شود شور آفرین ...

 

سئوگیلی قیزلار آدی اولسون آدین

ان گؤزل چاغلاردا دیلله نسین یادین

الوداع آی نازلی گؤل آی اورمو جان

الوداع ای جانِ آذربایجان ...

 

(بابک قوجازاده) 

+ نوشته شده در  دوشنبه پنجم خرداد 1393ساعت 20:1  توسط بابک قوجازاده  | 

 

استفاده از مطالب این وبلاگ فقط با کسب اجازه از صاحبان اثر مقبول است