بابک)
آچیب اوره ییمین سوفراسین ، سنه
آنامین دردینی دئمک ایسته رم
آتامین یاپدیغی حلال چؤرکدن
سنینله پایلاشیب یئمک ایسته رم
سیما)
دیدرگین دورنایام آی عزیز دوستوم
وطن قوجاغینا گلمک ایستیره م
غوربتده دیریلیک اؤلدورور منی
گلیب تبریزیم ده اؤلمک ایستیره م
بابک)
بوراخ کدرینی یوخ اولوب گئتسین
گل اوتور سنینله دانیشیب گولک
یوللارین یازدیقی آیریلیق سؤزون
بوتون سؤزلوکلردن سنینله سیلک
سیما)
سئوگی یوخ! کی نیفرت تؤره نیر منده!
غوربتین گولوشسوز باخیشلاریندان
جهنم دیر، جنت قوخویورسادا
آلدادان قاییرما ناخیشلاریندان!
بابک)
تبریزده یولونا تامارزی قالیب
بوراخ او جنّتی یادلارا قالسین
دئیرلر : گؤزللر وفاسیز اولار
کیمسه دن ایسته ییر قوی کامین آلسین
سیما)
آیریلیق اینجیدیر، سندن نه گیزلی!
سن سیز قالان بو من سئومه لی دئیل
سئوگیسینی قاپلان هایاندان تاپسین؟
آی سیز، گؤی سوز دوزن سئومه لی دئیل
بابک)
سندن سونرا یئتیم قالیب ائویمیز
بوداق – بوداق گوللر سنی سسله ییر
سن گلن یوللاردا یازدا – باهار دا
بنؤوشه – یاسمن ، لالا بسله ییر
سیما)
یوواسیز بیر قوشام! زمانه منی
وطن سیز، چمن سیز، دن سیز ایسته ییر
کئشکه یئنه سنله ....! آما یوخ! سانکی
تبریزیمیز سنی من سیز ایسته ییر
بابک)
اوخو بو مکتوبو آی عزیز دوستوم
نیسگیل دولو سؤزلر یازمیشام سنه
دورنا قاطارینا قوشولوب یئنه
قاییت اؤز یوردونا ، قاییت وطنه ...
سیما)
کؤرپولر آرخامجا سیندیریلیبلار
منله قاییتماقدان دانیشمایین سیز
یادلارا قویلانیب، گؤزدن ایتمیشه م
ایزلریمی سیلیر قوینوندان تبریز!
(شعر : بابک قوجازاده / سیما نصیب پرست)
هایانداسان ؟... (ترانه)
